Pagadian City – GIKORONAHAN na ang mga bag-ong rayna nga morepresentar sa Zamboanga del Sur ngadto sa national pageants pinaagi sa Binibining Zamboanga del Sur 2021 atol sa kasaulogan sa ika-69 nga Araw ng Zamboanga del Sur ning adlawng Biernes, Septembre 19.
Nasungkit ni Patricia Nicole Yap gikan sa lungsod sa Aurora ang titulong Bb. Zamboanga del Sur 2021. Ang garbo sa lungsod sa Aurora nga si Yap usa ka 3rd-year BS Psychology student nga dunay advocacy labot sa mental health awareness.
Mihakot usab og duha ka special awards ang 21-anyos nga dalaga lakip na ang Best in Long Gown ug Best in Swimsuit.
Naangkon sa 4th-year Metallurgical Engineering student ug pambato sa Pagadian City nga si Harl Cheezee Ontoy ang titulong Binibining Gembuntal GBae. Si Ontoy usa ka 4th-year metallurgical engineering student ug usa ka advocate sa cultural heritage preservation.
Napili nga Binibining Bai A Labi ang 21-anyos nga si Adel Ebarat gikan sa lungsod sa Tabina. Nakuha sa 4th-year BSBA student ang ‘Miss Ecotourism’ isip usa sa mga special awards sa beauty pageant. Advocacy ni Ebarat ang HIV ug AIDS awareness.
Samtang nakuha sa representante sa Dinas nga si Cherry Jane Mantiza ang 1st runner up samtang 2nd runner up ug Best in Local Settler Attire ang garbo sa Mahayag nga si Jan Melissa Mantos.
Miagi sa makuting categories sa kompetisyon ang 27 ka kandidata gikan sa ‘preliminaries’ sama sa paghukom sa ilang ‘tri-people inspired costumes’ sa mismo nilang lungsod hangtod sa aktwal nga coronation night diin nag-indigay sila sa evening gown ug swimsuit rounds ug ang kulbahinam nga question and answer portion.
Pinasahi ang prestihiyosong pageant sa lalawigan karong tuiga tungod kay gipahigayon kini nga ‘virtual’ isip pagsanong sa minimum health protocols taliwala sa nagpadayong COVID-19 pandemic.
Gipailawom ang mga kandidata sa gitawag og ‘bubble’ sugod Septembre 2 diin nagnegatibo sila sa swab test ug miagi sa COVID-19 vaccination nga maoy tema ug adbokasiya sa ika-69 nga founding anniversary sa Zamboanga del Sur.
#VictoryZamboangaDelSur #BidaAngBakunadongZambosurian
