GIDAYEG ni Philippine Cacao Industry Council Chairperson Armi L. Garcia si Gov. Victor J. Yu sa makugihong mga inisyatiba niini aron mapalambo ang industriya sa cacao sa Zamboanga del Sur.
Atol sa opening day sa pinakaunang Kakao Festival sa probinsya nga gipahigayon sa Capitol Covered Court, si Garcia nagkanayon nga dili na niya kinahanglang ipaila sa gobernador ang konsepto mahitungod sa maong tanom tungod kay mismong si Gov. Yu usa ka passionate cacao farmer.
Si Garcia nga usa ka honorary consul ngadto sa Russia ug iladong ‘cacao mover’ sa nasud, maoy usa sa mga pinasidunggang mamumulong sa maong makasaysayang kalihukan.
Gikalipay niya pag-ayo ang pagtinabangay sa mga partner-agencies sama sa Department of Trade and Industry ug Department of Agriculture aron nga mahimong sadya ug mabungahon ang industriya sa cacao sa lalawigan.
“This really demonstrates the spirit that we’re here to promote the cacao that we love… Celebrating the first cacao festival during a pandemic is really laudable. This is worth emulating and following…”, sigon pa sa guest speaker nga tubong Dipolog, Zamboanga del Norte.
Naglaum usab si Garcia nga dunay mamahimong representante gikan sa rehiyon sa umaabot nga panahon nga mapadala sa mga internasyunal nga kompetisyon o dili ba kaha makadawat og pasidungog sa bantugang Salon Du Chocolat sa Paris, France.
Mihatag usab si Garcia og giya unsaon nga mas malipay ang mga cacao farmers sa ilang pagpananom. Sumala niya nga malipay gayud ang mga farmers kung dunay maayong kalidad sa cacao beans ug nga makahimo sila sa pagproseso sa ilang mga abot nga mohatag unya ug maayong presyo sa ilang produkto.
Sa katapusan, gidasig ni Garcia ang mga cacao stakeholders sa Zamboanga del Sur ug sa tibuok rehiyon nga maghiusa ug magtinabangay aron usa lamang ka Philippine cacao ug Philippine chocolate ang matuboy ug mapalambo isip tinubdan sa nasudnong dungog, mapa-lokal man o internasyunal.
#VictoryZamboangaDelSur #TinuodNgaSerbisYu
