MAPASALAMATON ang 545 ka estudyante gikan sa Zamboanga del Sur sa ilang nadawat nga stipend allowance ilawom sa Tertiary Education Subsidy (TES) ug Tulong Dunong Program nga gipahigayon sa Mega Gymnasium, Provincial Government Center, Dao, Pagadian City, adlawng Huwebes.
Gikan sa maong ihap, 446 ka TES scholars ang midawat sa tag-20mil ka pesos samtang 99 ka beneficiaries ang midawat og tag-7,500 sa Tulong Dunong Program sa Commission on Higher Education.
Ang Tertiary Education Subsidy ug Tulong Dunong Program (TDP) parehong mga grant-in-aid programs nga gimugna sa national government aron matabangan ang mga estudyante sa kalungsuran nga walay pampublikong unibersidad ug walay ikagasto sa ilang pag-eskwela.
Sa iyang pamahayag, subling gidasig ni Governor Victor Yu ang mga scholars nga dili sayangon ang oportunidad nga gihatag kanila sa gobyerno aron makalampos sa ilang pagtuon.
Gibutyag usab sa gobernador ang iyang mga plano sa edukasyon sa probinsya sa laing tulo ka tuig sa iyang termino lakip na ang pag-establisar og laing Pagadian Campus sa Provincial Government College.
Matud ni Gov. Yu nga dakong kalipay kanila nga mga lideres sa probinsya nga makita nga nahimong kaabag ang mga programa sa gobyerno alang sa kabataan ug sa pagkab-ot sa ilang mga damgo sa kinabuhi.
