Gipadayag ni Governor Victor J. Yu nga gusto niyang mahimong ‘cacao country’ ang probinsya sa Zamboanga del Sur tungod sa dakong potensyal ug bentahe niini sa merkado.
Atol sa media conference alang sa pinakaunang Kakao Festival sa lalawigan adlaw nga Mierkules, gipahayag sa gobernador nga mao na kini ang iyang ‘target’ sukad sa iyang pagka-congressman nga mahimong nag-unang cacao-producer ang Zamboanga del Sur sa tibuok Mindanao sama sa nahimong record sa Davao.
Sulod sa lima ka tuig ug hangtod karon wala milunga si Gov. Yu sa pag-aghat sa mga kalungsuran nga magtanom og cacao aron makab-ot ang gipuntirya niining 10,000 ka ektaryang plantasyon sa maong high-value crop.
Sumala niya nga nagpadayon gihapon ang pagpadaghan sa cacao seedlings pinaagi sa gimugnang mga nursery sa probinsya nga makahimo ug 300,000 ka seedlings kada tuig ug libre kining giapod-apod sa mga interesadong magtanom ilawom sa ‘Pananom Program’.
Gisustinir usab sa kasamtangang pagdumala ang mga training alang sa cacao farmers aron nga mahatagan sila ug hustong kahibalo sa pagtanom ug pag-atiman niini.
Naglaum si Governor Yu nga mamahimong ‘added value’ ang Kakao Festival gikan Pebrero 11 ngadto 14 alang sa mauswagong cacao industry sa probinsya aron masayran sa mga mag-uuma kung asa nila ibaligya ang ilang mga abot.
Matud pa sa Department of Trade and Industry pinaagi ni Provincial Director Flora Miraflor, mokabat sa 285 metric tons ang produksyon sa cacao kaniadtong 2019 samtang miabot na ug 1,042 ka ektarya ang natamnan og cacao sa tibuok lalawigan sa mao gihapong tuig.
Sa pagkakaron, nag-una ang Molave ug Midsalip isip major processors sa mga produkto sa cacao sama sa tableya ug dark chocolate nga maoy ginagamit sa mga cake store, bakery, café, milktea shop, ug uban pang food establishments sa Zamboanga del Sur.
#VictoryZamboangaDelSur #TinuodNgaSerbisYu
