GIPADAYAG sa Zamboanga del Sur Provincial Task Force to End Local Communist Armed Conflict (PTF-ELCAC) ngadto sa mga local chief executives kung unsa ka mahinungdanon ang pag-implementar sa mga proyekto sa kagamhanan ilabina sa mga hilit nga kabarangayan.
Atol sa pinakaunaang panagtigum sa Provincial Peace and Order Council (PPOC) adlaw nga Lunes sa Zamboanga del Sur Provincial Government Complex, gipaabot ni Col. Jo-Ar Herrera, Commanding Officer sa 53rd Infantry Battalion Philippine Army, ngadto sa mga mayor sa kalungsuran nga dako kaayo ug gikatabang ang pagbukas og kadalanan ug mga road clearing projects aron masulbad ang communist insurgency sa mga lugar nga dunay presensya sa CPP-NPA.
Matud pa sa obserbasyon ni Herrera, kasagaran sa mga duawon o bisitahon sa mga communist terrorist groups ang mga hilit nga barangay nga wala gayuy infrastructure projects.
Gipaambit ni Herrera sa mga opisyales sa probinsya, mga national government agencies ug LCE’s nga ubay-ubay na nga mga road openings ug road clearing efforts ang nabuhat sa 547 Engineering Brigade, 53rd Infantry Battalion ug sa mga LGU’s diin duna nay nakumpleto samtanga padayon pang gitrabaho ang uban.
Lakip sa mga lungsod nga dunay gi-implementar nga ELCAC projects mao ang Bayog, Dumalinao, Dumingag, Midsalip, Kumalarang, San Miguel ug Tigbao.
#VictoryZamboangaDelSur #TinuodNgaSerbisYu
