Nakapunting karon ang Regional Development Council sa Zamboanga Peninsula sa pagpalig-on sa sektor sa agrikultura ug pagpangisda sa rehiyon aron mamahimong pinaka-sustainable agri-fishery industry sa Pilipinas.
Kini ang gipadayag ni Governor Victor J. Yu, atol sa eklusibong pakighinabi kaniya ni PCOO Secretary Martin Andanar sa programang Network Briefing News.
Sumala sa gobernador nga potensyal ang Westerm Mindanao sa natad sa agri-fishery tungod sa halapad niini nga coastal area ug daghang mga fish pond nga nag-produce ug klase-klaseng isda.
Kahinumdoman nga nahimo usab nga number one sa seaweed production ang Zamboanga Peninsula sa milabayng katuigan sa tibuok nasud, matud pa ni Gov. Yu.
Sa laing bahin, bentahe sa rehiyon matud pa sa DOST ang gidaghanon sa tubig-ulan diin mas abunda niini ang rehiyon ug maoy kinaham sa mga pananom.
Kaabag ang mga ahensiya sa DA ug BFAR, mas gihatagan karon og dakong pagtagad sa council ang pagpalambo sa produksyon pinaagi sa pag-implementar sa mechanization program aron makabenepisyo ang mga mag-uuma ug ang pagpasanay sa mga palaisdaan aron matabangan ang mga mangingisda sa rehiyon.
Dinhi sa probinsya sa Zamboanga del Sur, nakasentro ang mga programa sa kasamtangang administrasyon sa pagpanghatag ug free seedlings sa mga high value crops, pagpang-apod-apod og libreng similya sa seaweeds lakip na ang pagpanghatag sa libreng fingerlings ngadto sa mga nanag-iya ug fishpond ug fish cages.
Tungod sa maong mga inisyatiba, masiguro gayud sa administrasyon ni Gov. Yu nga magpabiling major food production center ug leading supplier sa mga produktong isda ug aquaculture products ang lalawigan sa Zamboanga del Sur.
#VictoryZamboangaDelSur #TinuodNgaSerbisYu
