Misentro sa paghatag og daghang oportunidad sa kababayen-an ang mensahe ni Governor Victor J. Yu atol sa pagbukas sa National Women’s Month Celebration 2021 sa Zamboanga del Sur.
Sa programa nga gipahigayon sa Megayon, Provincial Government Complex, gipasidunggan sa amahan sa lalawigan ang dakong kontribusyon sa mga kababayen-an sa katilingban.
Sumala ni Governor Yu nga daghang mga hiyas ang kababayen-an nga nahimong bentahe nila kompara sa kalalakin-an sama na lamang sa pagkasensitibo sa panginahanglan nga maoy ilang nabatasan sa panimalay, ang pagka-determinado sa bisan unsang pagsulay ug ang ilang pagpakabana sa bisan unsang aspeto sa kinabuhi.
Tungod sa maong mga maayong butang, nakita sa gobernador nga angayan lamang nga mas palapdan ang mga oportunidad nga para kanila sa natad sa panginabuhi, pagserbisyo ug pagtabang diha sa komunidad.
Gidasig ni Gov. Yu ang matag LGU nga suportahan ang iyang plano nga magmugna og mga trainings ug uban pang kalihukan nga maoy mo-ugmad sa katakus ug abilidad sa women sector sa probinsya.
Sa katapusan, gipadayag sa gobernador nga kung unsa man ang kalampusan nga nahimo sa kababayen-an diha sa ilang tagsa-tagsa ka komunidad, mohatod kini sa kalambuan ug kausaban sa tibuok lalawigan sa Zamboanga del Sur.
Dala ang tema nga “Juana laban sa pandemya: Kaya”, gitambongan ang pagbukas sa bulan sa kababayen-an ni Deputy Speaker Cong. Divina Grace Yu, mga provincial board members, Vice Gov. Roy Ariosa nga girepresentahan ni Dr. Corazon Ariosa, ug ang women’s federation nga gipangunahan ni Acting Provincial Federated President Donna Kathlyn Melo.
#VictoryZamboangaDelSur #TinuodNgaSerbisYu #WomensMonth2021
