MIDAWAT og pasidungog si Governor Victor J. Yu isip Bayani of the Year 2021 gikan sa World Philosophical Forum Philippines sa seremonyang gipahigayon sa Marcian Garden Hotel, Zamboanga City adlawng Dominggo. Si Provincial Information Officer Jeesrel Himang ang personal nga midawat sa award isip representante ni Gov. Yu nga wala makaadto sa venue tungod sa prior commitment.
Ang World Philosophical Forum usa ka non-governmental ug international organization nga nagtumong aron tabangan ang Pilipinas nga makalingkawas sa kapobrehon pinaagi sa pag-edukar sa mga katawhan gamit ang ideya nga nagsumikad sa katarungan, moralidad ug katungdanang pangkatilingban.
Si Governor Yu, ang chairman sa Zamboanga Peninsula Regional Development Council, usa sa sobra 30 ka mga recipients sa maong prestigious award nga gikan sa public service, medical practice, business, military ug civic groups tungod sa ilang dakong kontribusyon sa paglambo sa ilang tagsa-tagsa ka sektor o natad sa pagpangalagad.
Sa iyang gipadalang mensahe ngadto sa maong event, gipasalamatan ni Gov. Yu si WPF Chairman Shariff Ibrahim Albani ug Indian Ambassador B.K. Zutshi tungod sa maong pag-ila diin giisip niya kining inspirasyon ug pagdasig aron mas mohimo pa og mga programa para sa kaayohan sa tanang taga-Zamboanga del Sur.
Gipahinungod ni Gov. Yu ang maong pasidungog ngadto sa mga lideres ug katawhan sa lalawigan. Sumala niya nga dili kini makab-ot kung dili tungod sa kooperasyon ug pagpakabana sa mga Zambosurian.
#VictoryZamboangaDelSur #TInuodNgaSerbisYu
