GIHIMAKAK sa pamunuan sa Zamboanga del Sur Medical Center ang akusasyon nga mikatag sa social media nga dunay personahe sa maong ospital nga nanggisi og reseta.
Ning milabay nga mga adlaw, adunay isyu nga mitumaw sa Facebook gikan pinaagi sa usa ka post nga namasangil sama sa “ gigisian og reseta sa usa ka hospital staff”, “wala ma-akatar sa tambalanan” ug “ang diaper nga gigamit sa pasyente”.
Si Dr. Anatalio Cagampang Jr., hospital chief, nagkanayon nga dakong bakak ang mga gipost sa Facebook diin nadamay pa ang usa ka social worker nga gipasanginlan nga nanggisi og reseta.
Pagpaklaro ni Cagampang nga DILI TINUOD ang maong isyu tungod kay ‘intact’ ang prescription ug wala naunsa.
Pagpatin-aw pa ni Cagampang DIILI USAB TINUOD nga wala ma-akomodar ang pasyente tungod kay sa pagkatinuod gilibre pa og pagkaon ang amahan tungod kay wala kini kwarta.
Nasayran nga kaniadtong Marso 24 gi-admit ang usa ka babayeng buntis tungod sa sakit sa tiyan, gi-ultrasound kini og migawas nga resulta IUFD (intrauterine fetal death) nga buot pasabot patay na ang bata sulod palang daan sa taguangkan sa inahan.
Nadala ang pasyente sa ER. Apan nahutdan sila og supply sa adult diaper sa pila ka bulan, hinuon duna silay gipundo aron magamit pinaagi sa replacement o pagbayad niini. Sa laktod nga pagkasulti, mibayad lamang og 200 pesos ang tagtungod (walay patong) alang sa 5 ka diaper aron magamit sa inahan human sa pagdugo sulod sa pipila ka adlaw. Gisabot sa nurse ang amahan sa dead fetus nga sa diaper lang kini ibutang ug ibalot sa plastic cellophane aron malubong ug tuod misugot kini.
Dugang pa sa hospital chief nga wala silay Philhealth apan gipa-enroll sila as indigent Philhealth beneficiaries sa social worker sa hospital ug wala na silay gibayran.
Gihatagan usab kini ug groceries sa ZDSMC tungod kay 2 ka adlaw na siyang walay kaon.
Subling pagpahinumdom ni Dr. Cagampang, dili basta basta motuo sa mga gipost sa social media og ngadto sa mga dunay reklamo, dili magtumo-tumo og storya ug diretso sa ipadangat sa iyang buhatan.
#VictoryZamboangaDelSur #TinuodNgaSerbisYu
