SIYAM (9) ka mga former rebels kun kanheng rebelde sa Zamboanga del Sur ang midawat og P65,000 nga financial aid gikan sa gobyerno ingon nga mga benepisyaryo sa Enhanced Comprehensive Local Integration Program (E-CLIP) adlaw nga Martes.
Ang maong ayuda personal nga gitunol ngadto sa mga FRs atol sa gipahigayong Psycho-Social Activity and Values Formation Seminar sa Executive Function Hall, Provincial Capitol.
Naglangkob kini sa P50,000 nga livelihood assistance ug P15,000 nga immediate assistance gikan sa Department of Interior and Local Government.
Si Governor Victor J. Yu nagpasalamat sa mga kanhe rebelde sa ilang kooperasyon sa kagamhanan. Naglaum ang amahan sa lalawigan nga makatabang sa pag-usab sa ilang panginabuhi ang ilang mga nadawat nga ayuda.
Gibungat usab ni Gov. Yu nga kaabag na sa pag-asenso sa lalawigan ang mga mitahan sa ilang kaugalingon balik sa sabakan sa gobyerno.
Mitambong sa maong seminar ang 16 ka mga FRs nga gipailawom sa psycho-social intervention sa pagpanguna sa Provincial Social Welfare Development Office. (END)
#VictoryZamboangaDelSur #TinuodNgaSerbisYu
