Zamboanga del Sur- NAG-ATUBANG karon sa kasong administratibo si Mayor Danilo Taucan sa San Pablo, Zamboanga del Sur human mitumaw sa Commission on Audit report nga dunay overpricing sa pagpamalit og bugas aron iayuda sa mga lungsoranon nga naapektuhan sa pandemya.
Sa usa ka interview kang Atty. Banjo Cordero, legal counsel sa mga complainant, gibutyag niini nga ang maong kaso gikan mismo sa audit observation memorandum sa COA nga gipagawas kaniadtong Marso 22, 2021. Mabasa sa maong report nga nakadawat og P9milyones nga grant gikan sa national government ang San Pablo isip tabang sa mga naapektuhan sa COVID-19 pandemic nga gigamit sa munisipyo sa pagpalit og bugas.
Nasiplatan sa COA report nga imbis P925 lamang kada sako ang presyo sa bugas, mipatong si Taucan og P1,250 matag sako hinungdan nga nakaginansya kini og kapin sa P2milyones.
Pahayag ni Cordero nga sa dihang nadiskubrehan kini sa COA, gipangayuan og eksplinasyon si Mayor Taucan nganong nahitabo nga “overpriced” ang kantidad sa bugas apan wala matagbaw ang COA sa gihatag nga pagpasabot sa mayor hinungdan nga mipagawas kini og notice of disallowance kaniadtong Mayo 17, 2021. Subay sa maong notice, gimanduan ang mayor nga kinahanglan iuli niya ang kapin P2milyones nga maoy ilang naginansya sa usa lamang ka transaksyon.
Dugang pa ni Atty. Cordero, tulo (3) ka transaksyon ang gihimo sa pagpalit og bugas ngadto sa tulo (3) usab ka supplier. Usa sa mga supplier nga iyang ginganlan mao ang Hawk Rescue Equipment and General Merchandise nga matud pa sa ilang pag-imbestigar, kwestiyonable kining namaligya og bugas.
Ilawom sa RA 7581 kun Price Freeze Act, pwedeng mabilanggo gikan usa ngadto sa napulo ka tuig ug makamulta gikan P5k ngadto P2milyones ang bisan knsang public official nga mahukman sa maong kaso. Pwede usab silang ma-dismiss o permanenteng ma-disqualify sa paghupot og posisyon sa gobyerno.
Sa katapusan, gipaklaro ni Atty. Cordero nga walay kalabotan ang provincial government sa maong kaso tungod kay mismong ang COA ang nakabantay sa maong pagpahimulos sa kwarta sa gobyerno nga kusganong gipasang-at sa mga mag-uuma sa San Pablo ngadto sa husgado.
“Ngano man diay og kontra partido…pasagdan nalang ba diay sa mga katawhan nga sila maghimo og dili maayo? Kay himoon nalang rason nga gipulitika sila? Walay pulitika ani. Walay kalabutan ang probinsya, inisyatibo ni sa mga farmers kay nasakitan sila…,” sigon sa abogado.
#VictoryZamboangaDelSur #TinuodNgaSerbisYU
