AMINADO si Dr. Gem Punzalan, Medical Officer IV sa Regional Health Office 9, nga kinahanglang balik-balikan pagdasig ang mga senior citizen sa pagbakuna human masayran nga ubos kaayo ang porsyento sa mga nakadawat og COVID-19 vaccine gikan sa maong priority group sa tibuok Zamboanga Peninsula.
Pagbutyag ni Punzalan sa usa ka virtual vaccination forum nga gitambongan sa local media adlawng Lunes, 18% pa lamang ang kinatibuk-ang porsyento nga nabakunahan sa mga senior citizen (A2 priority group) sa tibuok rehiyon kon ikumpara sa ubang priority groups sama sa persons with comorbidities nga nitala og 52% ug health care frontliners nga 65% na ang kumpletong nabakunahan.
Dugang ni Punzalan nga angayang hatagan og atensyon ang A2 priority group tungod kay sila ang mas “vulnerable” kun talandogon sa viral infection nga posibleng mokomplikar sa ilang gihambin nga mga balatian.
Tungod niini, mas gipahugtan karon sa regional health department ang panawagan sa mga katawhan nga awhagon ang ilang mga kapamilyang senior citizens nga magpabakuna sa ilang mga local vaccination sites.
Gihangyo usab sa departamento ang pag-abag sa media aron ipalapnag ang hustong impormasyon ug kasayuran sa publiko mahitungod sa benepisyo sa bakuna ug mahusto ang mikatag nga ‘fake news’.
Dinhi sa Zamboanga del Sur, mihimo na og lakang si Gov. Victor Yu ug Deputy Speaker Cong. Divina Grace Yu aron madala sa kabarangayan ang pagbakuna pinaagi sa Mobile Resbakuna. Sa maong inisyatiba, dunay mga pahalipay ang provincial government ngadto sa mga magpabakunang seniors aron mas ma-engganyo pa ang uban nga magpa-vaccine batok COVID-19.
#VictoryZamboangaDelSur #TinuodNgaSerbisYU #WeHealAsOne
