Mipaambit og mga pagtulon-an mahitungod sa pagka-responsableng social media user si Governor’s daughter ug Zamboanga del Sur Youth Movement Chairman Victoria Yu atol sa gipahigayong Mobile Journalism and Career Guidance for Job Seekers Seminar adlawng Huwebes, Hulyo 29.
Sa iyang hamubong pakighinabi sa mga partisipante sa nasangpit nga kalihukan, gipadayag sa batan-ong lider nga mahinungdanon ang media ilabina karong panahon sa internet age diin paspas ang pagpalapnag sa mga impormasyon.
Gisaysay ni Victoria ang pipila ka mga kalidad sa usa ka sulundong media practitioner o bisan pa man social media user. Matud niya nga importante nga matinud-anon ang mga impormasyon o balita nga ipadangat diha sa social media labi na sa pagsibya niini.
Segun ni Victoria nga dili maayong gawi ang ginabuhat sa uban nga ganahan magkuha og impormasyon apan ila kining ibaliktad o usabon aron lang makadani og mga tawo sa ilang balita.
Gidugang niya nga kinahanglan katuohan ang usa ka media worker. “Mahimo ng credible imong news tungod kay sige ka og hatag information nga tinuod. Kadugayan ma-earn nimo ang trust sa katawhan nga tinuod ang imong gipangsulat o gibalita, pagpasabot sa Governor’s daughter.
Gilakbitan usab sa batan-ong lider nga kinahanglan “understandable” kun dali masabtan ang gipaabot nga kasayuran ngadto sa mga tigpaminaw aron mas mahimong epektibo ang komunikasyon ilabina sa natad sa paghatod ug serbisyo sa gobyerno.
Ang Mobile Journalism ug Career Guidance Seminar usa ka inisyatiba sa Provincial Press Bureau aron paghatag og libreng oportunidad aron makat-on ang mga partisipante sa pagkahimong responsableng social media user, paggamit sa mobile phones sa pagbalita ug ang paghatag og giya sa mga gustong mo-apply ug trabaho.
#VictoryZamboangaDelSur #TheGovernorsDaughter
