MOKABAT sa 200 ka vials kun 1,200 ka doses sa bakunang Pfizer ang nahidangat sa Zamboanga del Sur Integrated Provincial Health Office gikan sa Department of Health Region-9 Zamboanga City adlaw nga Huwebes, Septembre 2, 2021.
Mao kini ang pinakaunang batch sa mRNA-type vaccine nga gigama sa Pfizer-BionTech nga pagagamiton sa nagpadayong vaccination rollout dinhi sa probinsya. Ang maong klase sa bakuna kinahanglan tipigan sa storage temperature nga -80 degrees centigrade.
Sumala ni Provincial Health Officer Dr. Anatalio Cagampang Jr., ang Pfizer vaccines maoy pagagamiton sa A1, A2, A3 ug A5 priority groups. Pagpasabot niya nga sa pagkakaron dili pa kini maapod-apod sa mga lungsod tungod kay nagkinahanglan kini og espesyal nga portable storage. Kung mapagawas na gikan sa ultra low freezer ang bakuna, kinahanglan kini mahatag sulod sa 2-5 ka oras.
Ang Provincial Government sa Zamboanga del Sur sa pagpangulo ni Governor Victor Yu mituyo gayud pagpalit og duha ka ultra low freezers nga nagkantidad og kapin P500k matag-usa ka unit ug kayang motipig og 8,000 ka vials sa maong sensitibong klase sa bakuna.
Gilauman nga sa pag-abot sa Pfizer vaccines sa probinsya, mas maaghat ang mga katawhan nga magpabakuna ug makatampo sa gitinguhang herd immunity.
#VictoryZamboangaDelSur #TinuodNgaSerbisYU
