DIREKTANG GIPAHAYAG ni Deputy Speaker ug 1st District Cong. Divina Grace Yu nga walay problema kaniya ang pagmugna og ikatulong distrito o kung bahinon man o dili ang Zamboanga del Sur sumala sa hulongihong sa mga lideres sa siyudad ug probinsya APAN duna siyay gustong ipaklaro mahitungod sa maong plano.
Atol sa kasaulogan sa ika-36 nga anibersaryo sa 53rd Infantry Battalion, gihatagan ug katin-awan sa congresswoman nga mismo si Governor Victor Yu nakakab-ot sa samang hunahuna, sa milabayng kongreso, nga bahinon sa 3 ka distrito ang Zamboanga del Sur. Apan natingala matud pa si Cong. Yu nga duna nay plano ang ubang mga lider sa lalawigan nga himuon ang maong lakang nga wala makigsabot sa gobernador kung angay na ba kining hatagan ug katumanan.
Gipatin-aw usab sa deputy speaker nga sayop ang pangagpas nga madugangan ug laing alokasyon o budget kung dunay mahimong bag-ong distrito sa Zamboanga del Sur. Sumala pa niya nga sa pagkakaron dunay bahin nga P4bilyones ang probinsya diin dunay tag-P2bilyones ang kada distrito. Kon ugaling matinuod ang 3 ka distrito, wala magpasabot nga makaangkon kini ug laing P2bilyones apan mabahin hinuon ang P4bilyones ngadto sa tulo, buot pasabot duna na lamang kapin usa ka bilyon ang matag distrito.
Pagdugang sa kongresista nga sa Kongreso dili advisable ang pagsige ug bukas ug laing district aron lang makabaton ug allocation tungod kay dako kaayo kini ug gasto sa puder sa gobyerno sama na lamang sa giplano sa Kongreso nga himuong strikto ang pag-aprubar sa mga partylist tungod sa dakong pahat nga makuha niini.
Pag-eksplikar ni Cong. Yu nga wala na siya masayod kung unsay resulta sa giduso nga balaodnon gikan sa kongresista sa ikaduhang distrito nga si Cong. Leonardo Babasa Jr. mahitungod sa pagmugna ug laing distrito.
Apan nagtuo siya nga dili kini musulod tungod kay kinahanglan maapil kini sa agenda sa komite og dili kini sayon nga proseso tungod kay kinahanglan pa kini suportahan og datos aron mahatagan ug gibug-aton ang pagmugna og ikatulong distrito sa Zamboanga del Sur.
#VictoryZamboangaDelSur #TinuodNgaSerbisYu
