GIPADAYAG ni Zamboanga del Sur Governor Victor Yu nga dakong kontribusyon sa kalambuan sa Pagadian City ang iyang paghatag og dakong pagtagad sa mga kalungsuran ug kabarangayan pinaagi sa mga nagkadaiyang proyekto ug programa nga gibuhos sa una ug ikaduhang distrito.
Kini ang gipahayag sa amahan sa lalawigan atol sa pag turnover sa bag-ong covered court sa Barangay Muricay sakop ning siyudad sa Pagadian adlawng Huwebes.
Matud pa ni Gov. Yu nga kaabag sa pag-asenso sa Pagadian ang mga munisipyo tungod kay gikan sa kalungsuran ang mga nagdala sa produkto ug kwarta dinhe sa siyudad aron dinhe ipatigayon.
Pagsaysay sa gobernador nga anaa sa 80 porsyento sa mga mamalitay o katong nagdala ug salapi sa provincial capital ang mga katawhan nga gikan sa lain-laing kalungsuran.
Mao kini ang katuyoan kung ngano nga nakatagamtam sa pagpausbaw sa panginabuhian ang mga lungsod ug kabarangayan aron nga makapa-omento usab kini sa ekonomiya sa Pagadian.
Ilawom sa kasamtangang administrasyon, gihatagan og pagtagad ni Gov. Yu ug Deputy Speaker Cong. Divina Grace Yu ang mga livelihood programs, infrastructure projects ug uban pang mehoras aron moresulta kini sa kalambuan ug kausaban.
Sa laing bahin, gisaad ni Gov. Yu nga gahinan og usa ka set nga heavy equipment ang Pagadian City karong tuiga aron magamit sa pagpanindot sa kadalanan sa mga barangay nga sakop ning siyudad.
#VictoryZamboangaDelSur #TinuodNgaSerbisYu
