Mokabat sa P150Million nga kinatibuk-ang kantidad sa mga kahimanang pang-uma gikan sa Philippine Center For Post Harvest Development and Mechanization (PhilMech) ang giapod-apod sa mga farmers cooperative ug association sa probinsya sa pagpanguna sa Department of Agriculture ug kagamhanang probinsyal sa Zamboanga del Sur.
Adlaw nga Lunes, giturnover ang ikaduhang batch sa mga agri-machineries nga nagbalor og sobra P50Milyones nga gipahigayon sa Megayon, Dao, Pagadian City ug gipangunahan ni Gov. Victor J. Yu ug Deputy Speaker Cong. Divina Grace Yu kauban si Regional Director Rad Donn Cedeno sa Department of Agriculture Region 9.
Gitambongan usab kini ni USEC Zamzamin Ampatuan, DA Undersecretary for Regulations and Infrastructure ug Engr. Edgar Testa, ang representante sa PhilMech nga parehong midasig sa mga mag-uuma sa probinsya nga pahimuslan ang mga gihatag nga kagamitang pang-uma aron mas mapalambo ang ilang produksyon sa humay ug moresulta sa maayong abot ug kita.
Lakip sa mga farmers association nga nakabenepisyo sa maong programa ilawom sa Rice Competitiveness Enhancement Fund Mechanization Component mao ang Aurora, Sominot, Dumalinao, Guipos, Kumalarang, Lakewood, San Miguel, San Pablo, Labangan, Tigbao ug Pagadian City.
Ang mga farm equipment units nga gi-distribute sa maong kalihukan ang 18 ka four-wheel tractor, 3 ka hand tractor, 10 ka float-assist tiller, 1 ka precision seeder, 9 ka walk-behind rice transplanter, 6 ka rice reaper, 9 ka rice combine ug 3 ka rice thresher.
Sa kinatibuk-an, mototal sa 48 ka mga Farmers Cooperatives and Associations (FCA) sa tibuok lalawigan ang nakadawat na sa mga makinaryang pang-uma pinaagi sa RCEF Mechanization Component ilawom sa Philippine Center For Post Harvest Development and Mechanization uban ang pagtabang sa agriculture department ug provincial government sa Zamboanga del Sur.
Mapasalamaton kaayo ang mga kooperatiba sa mag-uuma tungod sa maong mga modernong teknolohiya nga ilang magamit sa pagpasayon sa ilang pag-uma. Panaad sa mga benepisyaryo, ilang ampingan ang maong farm machineries aron mapahimuslan pa sa umaabot nga henerasyon.
#ZamboSurAgri
#VictoryZamboSur #TinuodNgaSerbisYu
