GIHATAGAN ug katin-awan ni Zamboanga del Sur Medical Center Chief Dr. Anatalio Cagampang Jr. ang mikalat nga fake news mahitungod sa pagkamatay sa usa ka batan-ong pulis nga si Patrolman Sanny Dacal nga nadisgrasya sa Labangan ning milabayng adlawng Dominggo.
Sa usa ka press briefing adlaw nga Mierkules, gipaklaro ni Cagampang nga dili COVID-19 ang gikamatyan sa pasyente kondili ang final diagnosis niini TRAUMATIC BRAIN INJURY. Apan migawas nga nagpositibo kini sa rapid antigen test samtang gi-admit kini sa ZDSMC.
Subay sa protocol sa DOH, gina-test ang matag pasyente nga ginadala sa hospital ug kabahin sa pulis nga naaksidente, migawas sa rapid antigen test nga positibo kini nga sumala sa guidelines sa DOH, matawag nga confirmed case.
Adlawng Lunes na nakuhaan og RT-PCR test ang pasyente tungod kay walay mapadagan nga test og adlawng Dominggo. Mitumaw sa RT-PCR test nga negatibo kini sa COVID-19 apan kinahanglan ilubong kini sulod lamang sa 24 oras tungod kay COVID suspect ang nasangpit nga pasyente, sumala sa DOH guidelines.
Gipatin-aw usab ni Dr. Cagampang nga wala ma-dead on arrival ang pasyente sukwahi sa mikatag nga balita sa social media nga na-DOA kini. Pamatuod niini nga naatiman pa kini sa mga doctor sa nasangpit nga hospital.
May kalabutan sa giagian nga proseso sa pasyente gikan sa hospital paingon sa pagpahiluna sa patayng lawas niini, gipasabot ni Dr. Robert Capatoy nga nagsunod lamang sila sa kung unsa ang polisiya ug giya gikan sa Department of Health.
Gipangulipas usab ni Dr. Cagampang ang isyu nga gipanapian matud pa sa hospital ang COVID situation sa probinsya. Sumala niya nga wala sila nangwarta sa mga COVID patients og kamatuoran niini, wala pay nabayaran ang Philhealth ni bisan usa ka Covid patient sa probinsya sukad nagsugod ang pandemya.
May kalabotan sa isyung legal, gipahayag ni Atty. Dang Mariano, legal counsel sa Provincial Task Force, dunay purohan nga mo-file ug kaso ang provincial government batok sa mga magpakatag ug dili hustong kasayuran nga nagdaot sa imahe sa hospital.
Paghangyo usab ni Cagampang kung unsa man nga mga concerns o reklamo, andam ug bukas ang iyang opisina sa pagtubag niini. Matud pa niya nga naningkamot sila nga moalagad sa mga katawhan aron mahatag ang gikinahanglang serbisyo medikal gikan sa Zamboanga del Sur Medical Center.
#VictoryZamboangaDelSur #TinuodNgaSerbisYu
