Aron maatiman ang panglawas sa mga kababayen-an sa Zamboanga del Sur, gimugna karon ang Center for Women’s Health sa Zamboanga del Sur Medical Center nga magtagana og mga libreng serbisyo medikal.
Gipadayag ni Board Member Dang Mariano sa programang Kasayuran sa Zamboanga del Sur nga pormal nga ilusad ang maong programa karong Marso 1 atol sa pagsaulog sa Women’s Month.
Sumala ni Atty. Mariano nga ang maong programa usa sa mga importanteng provision sa sa Revised Gender Code sa probinsya nga naglaraw sa pag-atiman sa mga panginahanglanon sa women sector.
Ang mga libreng serbisyo sa maong center ma-avail sa tanang kababayen-an sa probinsya diin dunay pagahimuong mga schedule niini para sa mga lungsod.
Pagatutokan sa Center for Women’s Health ang “curative” ug “preventive” measures sa kasagarang giatubang nga mga sakit sa kababayen-an sama sa breast cancer ug cervical cancer.
Gibutyag usab ni Mariano nga nag-order na ang probinsya ug mga kagamitan alang sa maong center nga makaplagan sa ZDSMC.
Lakip sa mga i-purchase nga equipment mao ang mammogram alang sa pag-detect sa mga early signs sa breast cancer ug ang colposcopy aron sa pagdetect usab sa cervical cancer.
Adunay mga espesyalista usab sama sa mga obstetrician-gynecologist nga mohatag pagtagad sa mga kababayen-an sa maong buhatan.
Ang nasangpit nga programa usa sa mga inisyatiba ni Gov. Victor J. Yu ug Cong. Divina Grace aron maampingan ang panglawas sa mga kababayen-an ug pagpalambo usab sa mga serbisyo nga gihatag sa Zamboanga del Sur Medical Center.
#VictoryZamboangaDelSur #TinuodNgaSerbisYu
