Gibutyag ni Gov. Victor J. Yu nga sila mismo sa kagamhanang probinsyal ang mag-una sa pagpabakuna kung gikinahanglan aron makumbinse ang katawhan nga magpaturok sa umaabot nga COVID-19 vaccine.
Kini ang direktang gipahayag sa amahan sa lalawigan sa iyang mga previous interview may kalambigitan sa gipanghingusgang kampanya sa gobyerno alang sa national vaccination rollout.
Sumala sa gobernador nga dunay mga pagduha-duha o kahadlok ang kadaghanan sa mga katawhan apan tungod lamang kini sa tsismis o mga fake news nga ilang nasagap diha sa social media.
Migawas sa pinakaulahing survey sa OCTA Research Group nga 19% lamang sa mga Pilipino ang interesado o gustong magpabakuna sa COVID vaccine, rason aron mas palapdan pa sa kagamhanan ang pagpasabot ngadto sa publiko.
Sa Zamboanga del Sur, gimugna na ang Vaccine Operations Center nga maoy gitahasan dili lamang sa pagahimuong pagbakuna sa mga residente apan sa paglusad usab og information drive taman sa kabarangayan aron mahayagan ang hunahuna sa katawhan mahitungod sa benepisyo sa bakuna.
Gilauman usab nga pagasugdan na ang simulation exercise sa vaccination rollout sa probinsya sa unang semana sa Marso karong tuiga.
#VictoryZamboangaDelSur #TinuodNgaSerbisYu
