Subling gipahayag ni Governor Victor J. Yu atubangan sa usa ka panagtigum sa mga indigenous people sa lungsod sa Bayog ang importansya sa maayong pagdumala ug pangagamhanan isip yawe sa kalinaw ug kalambuan.
Atol sa paglusad sa IP’s Indigenous Political Structure ug Abaca Trainor’s Training nga kabahin sa programang ELCAC sa gobyerno sa Brgy. Cunacon adlaw nga Huwebes, gihatagan ug giya sa gobernador ang gi-organisang istrukturang politikal sa katawhang lumad diin iyang giawhag ang mga lideres niini sa pagpakita sa ilang maayong buhat ingon nga ehemplo sa ilang mga ginsakupan.
Gihatagag gibug-aton sa amahan sa lalawigan ang pagkasinsero sa pagpangalagad aron makita ang pagsalig ug pag-kooperar sa katawhan sa mga programa nga ipatuman sa kagamhanan.
Gipaambit usab niya ang dili dapat pulitika ang hinungdan aron magkahiusa ang matag-usa kondili ang maayong pagdumala kun good governance.
Gisulti sa gobernador nga dili niya gusto ang “governance” nga manghulga, mangdaug-daog, mangilad ug mamintaha tungod lang kay milingkod isip lider.
“Dili ko ganahan og ingon ana nga klase sa governance. Gusto nakong ipaabot nga magbaton ta og respeto bisan ngadto sa pinakaubos nga hut-ong sa katawhan diha sa atong lugar,” sigon sa gobernador.
Sa katapusan, gidasig ni Gov. Yu ang mga IP leaders nga bukas ang provincial government aron motabang kanila sa natad sa livelihood opportunities ug trainings ug sa uban pang programang pangkalambuan.
#VictoryZamboangaDelSur #TinuodNgaSerbisYu
