Subling gipadayag ni Deputy Speaker Cong. Divina Grace Yu nga uyon siya ug andam siyang mosuporta kung dunay madugang nga ikatulong distrito sa Zamboanga del Sur sumala sa gihingusgan sa kampo ni Pagadian City Mayor Sammy Co ug 2nd District Cong. Leonardo Babasa Jr.
Apan pagpatin-aw sa deputy speaker nga dili igo nga miabot na sa kwalipikadong voting population nga 250,000 aron matuman kini tungod kay kinahanglang moagi kini sa masusing pagtuon sa Kongreso ug Senado – kung angayan ba gayud kining ipasa isip hingpit nga balaod.
Nasayran nga mipasa sa maong balaod si 2nd District Cong. Leonardo Babasa Jr. sa kasamtangang Kongreso sa walay pagkonsulta sa magtiayong Yu. Hagit ni Cong. Yu kang Babasa, ilusot ang maong bill sa Kongreso kung siya man ang Vice-Chair sa committee.
Sama sa miaging mga pahayag sa kongresista, iyang gipaklaro pagbalik nga dili basta-bastang proseso ang pagmugna og laing distrito ug dili usab automatic nga makabaton og P2.4billion nga alokasyon ang congressman kon ugaling matinuod kini.
Sa laing bahin, gitubag usab ni Cong. Yu ang isyung walay nabubo nga proyekto ang kagamhanang probinsyal sa Pagadian City.
Sa iyang Facebook page, gikompara sa kongresista ang income sa probinsya ug Pagadian City nga kung kuhaan sa expenses sa ZDSMC, parehong motungtong sa P1.4 billion.
Pangutana ni Cong. Yu, nganong makahatag man si Gov. Victor Yu og P20M nga kantidad sa proyekto sa 26 ka lungsod kada tuig, financial assistance nga P30M kada tuig, daghang scholars kada semester, livelihood programs sa farmers ug fisherfolks – sa probinsya nga dunay 681 ka barangay kompara sa siyudad nga aduna lamang 54 ka barangay?
Hagit ni Cong. Yu kang Mayor Co nga mas maayong ipadayon niya ang pagserbisyo sa Pagadian City.
“Kung unsay naa nimo karon paningkamoti nga makahatag ka og dagko ug daghang kaayuhan sa mga tawo aron motuo ang mga tawo nimo,” sigon sa kongresista.
Gihagit usab ni Deputy Speaker Yu si Mayor Co nga modagan kini pagka-kongresista aron siya mismo ang mangunay og duso sa paghimo og ikatulong distrito sa Zamboanga del Sur kon ugaling modaug kini.
#VictoryZamboangaDelSur #TinuodNgaSerbisYu
