GIKUMPIRMA ni Provincial Haealth Officer Dr. Anatalio Cagampang Jr. nga nakatala na ang Zamboanga del Sur og pinakaunang kaso sa COVID-19 B.1.1.7 UK variant.
Gibutyag ni Cagampang nga ang pasyente usa ka babaye nga 38 anyos ug returning OFW gikan sa Kuwait, residente sa Labangan, Zamboanga del Sur.
Naabot kini sa Manila Pebrero 14 ug miagi sa usa ka semana nga quarantine subay sa protocol.
Gi-swab test kini Pebrero 20 ug migawas ang resulta nga positibo siya sa COVID-19 pagka-Pebrero 21.
Tungod kay gikan sa gawas sa nasud ang maong babaye, gipailawom sa ‘genome sequencing’ ang iyang COVID-19 result.
Misinati siya og hilanat, sore throat, ug nawad-an siyag panlasa ug panimaho lakip na ang ‘myalgia’ kun pamuypoy sa lawas.
Gipailawom sa laing napulo ka adlaw nga quarantine ang pasyente.
Human na-clear sa infection ang OFW, miuli kini sa Zamboanga del Sur via Cagayan de Oro sakay sa sakyanan sa OWWA kaniadtong Marso 3.
Gi-endosar na kini sa local health authorities sa Labangan ug mipailawom na sa striktong home quarantine.
Miabot ang resulta nga positibo sa UK variant ang pasyente kagahapong adlawa, Marso 15.
Gipailawom na usab sa quarantine ug surveillance test ang pamilya ug close contacts sa maong OFW.
Pagpasabot sa doktor nga kabahin lamang ang maong procedure sa pagmonitor sa pasyente sa posibilidad nga dunay ‘delayed transmission’ sa iyang pamilya.
#VictoryZamboangaDelSur #TinuodNgaSerbisYu
