GIDASIG ni Governor Victor J. Yu ang mga bag-ong CAFGUs nga tumanon ang ilang gipanumpaang katungdanan alang sa kahusay ug kalinaw sa probinsya.
Kini ang mensahe nga gipaabot sa amahan sa lalawigan atol sa gipahigayong Send-Off Ceremony ug Turnover of Firearms sa 153 ka mga Citizen Armed Force Geographical Unit Active Auxiliaries (CAAs) adlawng Lunes sa 53rdIB Headquarters, Camp Sabido, Guipos, Zamboanga del Sur.
Gipasalig sa gobernador nga andam ang probinsya sa paghatag og moral ug pinansyal nga suporta sa mga CAA. Iya usab giila ang dakong kontribusyon nila sa pagpatunhay sa peace and order sa Zamboanga del Sur.
Si 2nd District Board Member John Regala mipaabot sa iyang paghagit sa mga CAFGU. Sumala niya nga daghan ang nagtinguha nga mamahimong sama kanila apan pipila lamang ang napili. Dugang pa ni Regala nga kinahanglan magpadayon ang ilang disiplina sa kaugalingon tungod kay nagdala sila sa pangalan sa unit lakip na kang Governor Yu.
Gipahinumdoman usab ni 53rdIB Commanding Officer LTCOL Jo-ar Herrera ang mga migradwar nga CAA nga ikinabuhi ang ilang naagian nga training ug gamiton kini sa pagtuman sa ilang mga tahas. Pag-awhag sa commanding officer ngadto kanila, magpabilin silang komitado ug mainiton sa pag-alagad sa katawhan ug maningkamot nga mamahimong hingpit nga sundalo.
#VictoryZamboangaDelSur #TinuodNgaSerbisYu
