GIPADAYAG sa House of Representatives pinaagi ni Deputy Speaker Cong. Divina Grace Yu nga kasamtangang gitun-an sa Committee on Public Order and Safety ang pag-amyenda sa Republic Act No. 10591 kun Comprehensive Firearms and Ammunition Regulation Act (CFARA) aron matagad ang mga kakulangon sa implementasyon niini ug aron mas mapalig-on ang regulatory mechanisms alang sa mga armas.
Kini ang sentro sa speech ni Cong. Yu atol sa gipahigayong ASEAN Inter-Parliamentary Assembly (AIPA) Forum on Small Arms and Light Weapons Regional Webinar adlaw nga Martes.
Sumala ni Cong. Yu nga kinahanglan magkauyon ang mga probisyon sa CFARA ug sa Republic Act No. 10697 kun Strategic Trade Management Act (STMA), lakip na ang mga nakalatid sa Republic Act No. 10863 kun Customs Modernization and Tariff Act (CMTA), kalabot sa importasyon, eksportasyon, pagkontrol ug regulasyon sa mga conventional firearms ug mga components niini.
Gipahayag usab sa kongresista sa maong virtual conference nga kinahanglan mas palig-onon pa ang operational capability sa PNP sa pagrekuber og loose firearms ug masigurado ang tukmang accounting, inventory ug registration niini. Mas maaayong palapdan usab ang capacity building programs sa Firearms and Explosives Office sa PNP, ingon nga regulatory agency alang sa licensing ug registration sa mga armas.
Kalabot niini, usa ka National Action Plan on Small Arms and Light Weapons ang gimugna ug gipasa kang Presidente Rodrigo Duterte kaniadtong tuig 2017 isip pagsuporta sa Sustainable Goal 16.4 sa United Nations nga naglaraw nga mapakunhod ang ilegal nga patigayon sa armas ug masuklan ang tanang klase sa organisadong krimen sa tuig 2030. Gilauman sa Kongreso nga mahatagan kini og ehekutibong aksyon sa dili madugayng panahon.
Sigon ni Deputy Speaker Yu, tumong sa maong mga paningkamot nga makab-ot ang labing maayong tumong sa kagamhanan sa Pilipinas nga mawagtang ang armadong pakigbisog ug masiguro ang malungtarong kalinaw sa nasud.
#VictoryZamboangaDelSur #TinuodNgaSerbisYu
