GITAKDANG gamiton sa tibuok probinsya sa Zamboanga del Sur ang S-PASS sugod Abril ning tuiga human gimando ni Zamboanga del Sur Governor Victor Yu kang Provincial Tourism Officer Atty. Maria Jihan Bana nga ilusad ang training ngadto sa kalungsuran labot sa paggamit sa maong system nga gimugna sa Department of Science and Technology.
Ang S-Pass kun Safe, Swift and Smart Passage usa ka travel management system nga gipaila sa DOST gamit ang smart phones nga makapasayon sa pagbiyahe sa mga tawo lakip na ang contact tracing aron masuta ang posibleng nataptan o kaha nakauban sa nahimong Covid-19 patients. Sa inisyal nga kasayuran, kinahanglan ang pagparehistro aron makaangkon og assigned QR code nga maoy e-scan sa mga lugar nga aduna’y QR Code Scanner Station.
Buot ni Gobernador Yu nga mapatuman ang maong application sa labing madaling panahon dinhi sa probinsya. Nasayran nga mokabat sa 72 porsyento na sa mga lugar sa Pilipinas ang naggamit na sa S-PASS. Sa kasamtangan, padayon gihapong giawhag sa DOST ang mga local government units nga gamiton ang maong pinasayon nga travel management app.
Nahisgutan ang paggamit sa S-PASS atol sa gipahigayong panagtagbo sa mga sakop sa PIATF kon Provincial Inter-agency Task Force adlawng Miyerkules, March 17, 2021.
#VictoryZamboangaDelSur #TinuodNgaSerbisYu
