MIDAWAT sa ilang stipend allowance nga bente mil ka pesos (P20,000) ang anaa sa 247 ka mga student scholars sa Zamboanga del Sur Provincial College Pagadian Campus kagahapong adlawa.
Ang maong kantidad nga gikan sa program ani Presidente Rodrigo Duterte madawat sa mga estudyante matag semester diin mokabat kini sa P40,000 matag tuig.
Atol sa maong programa, subling gidasig ni Governor Victor J. Yu ang kabataan nga magtuon ug maayo aron nga molampos sa ilang pag-eskwela. Sumala sa amahan sa lalawigan nga makapadasig kanila isip public servants ang pagtrabaho alang sa katawhan kung duna silay madungog nga maayong resulta sa mga programa nga gitagana sa gobyerno ngadto sa katawhan.
Gibutyag usab ni Gov. Yu sa maong okasyon nga posibleng pagasugdan na karong tuiga ang bag-ong building ug campus sa provincial college sa Dao diin gigahinan na kini ug P50milyones.
Nasayran nga na-realigned ang budget sa maong skwelahan tungod sa COVID-19 pandemic apan gipahibalo sa gobernador nga duna nay nakuhang hulip nga pondo aron makabaton og mas hamugaway ug lapad nga school building ang Zamboanga del Sur Provincial College.
#VictoryZamboangaDelSur #TinuodNgaSerbisYu
