HUGTANONG GIPADAYAG ni Dr. Roma Decastro-Quiroz nga gihimo nila ang saktong pag-atiman ug pagtagad kang Jeneve Carillo ug sa ka-live in partner niini nga si Rommel Aguilar, sukwahi sa nabaniog nga isyu nga gipasagdaan sila sa Zamboanga del Sur Medical Center.
Nasayran nga miabot sa national TV ang reklamo ni Rommel Aguilar nga giakusahang gipasagdaan kuno sila sa nasangpit nga government hospital lakip na ang uban pang alegasyon batok kang Dr. Decastro-Quiroz ug sa pamunuan sa ZDSMC.
Sa usa ka press conference, giyagyag sa ZDSMC sa pagpamuno ni Dr. Anatalio Cagampang Jr. nga walay basehan ang mga reklamong midangat sa programa ani Ben Tulfo ug diretsahan kining gitubag sa mga nalambigit nga doktor ug personahe sa balay-tambalanan.
Pagpaklaro ni Dr. Decastro-Quiroz nga wala silay mahunahunaan nga kakulangon labot sa ilang pag-akatar sa pasyenteng si Carillo tungod kay base sa records, nasunod ang proseso sa pag-akomodar sa pasyente sa tukmang panahon.
Alegasyon ni Aguilar, ang live-in partner ni Carillo nga namatay ilang anak tungod sa pagpasagad sa pamunuan sa ZDSMC. Apan matud sa ekplinasyon sa mga doktor, “intrauterine fetal demise” ang gidangatan sa ilang baby kun sa laktod nga pagsabot, patay na kining daan sulod pa lamang sa taguangkan sa inahan tungod sa “attempt” nga abortion nga mismong si Aguilar ang mibungat ngadto sa iyang nahinabing mga doktor.
Sumala sa pahayag ni de Castro ug sa uban pang doktor, makadaghan nga higayon nga nadunggan nila kang Aguilar nga gisulay nila pagpakumot ang bata sa tiyan sa iyang live-in partner ug gipainom pa kini og usa ka pait nga ilimnon.
Pagsaysay sa mga doktor sa hospital nga gihatag nila ang tanang assistance alang sa kaayuhan sa pasyente. Nahatagan kini ug financial assistance gikan sa governor’s office aron mapalit ang ilang reseta, napahiluna kini og tarong sulod sa hospital, ug labaw sa tanan WALA KINI GIBAYARAN nga bisag usa ka sentimo ingon nga naka-avail sila sa “no balance billing” sa ZDSMC tungod kay indigent patient kini ug giparehistro mismo sa hospital sa PhilHealth.
Kusganong gihimakak usab ni Dr. Decastro-Quiroz ang akusasyon nga misulay kini pag-suborno kang Aguilar nga mohatag og P30,000 aron dili magreklamo sa program ani Tulfo. Pahayag sa doktor wala siyay numero sa pasyente ug dili niya batasan ang pagpangayo og contact number sa mga pasyente sa pagka-discharge nila gikan sa tambalanan.
Subay sa miabot nga reklamo sa programang Bitag ni Ben Tulfo, dunay mga screenshots sa text message nga matud pa gikan kang Dr. Decastro-Quiroz apan tataw ug klaro nga mugna-mugna lamang kini tungod kay dili maayong mag-Bisaya ang doktor ug dili kadto iyahang kumpirmadong cellphone number.
Kahinumduman nga mihatag na og official statement ang ZDSMC mahitungod sa reklamo ni Aguilar kaniadtong bulan sa Marso diin una niyang gireklamo nga gigisian siya og reseta sa usa ka nurse apan wala niya kini mapamatud-i. Pahayag ni Dr. Cagampang nga gipatawag pa niya ang tanang nurse sa ospital aron ipatudlo kang Aguilar kung kinsa ang naggisi sa iyang reseta apan pakyas kini sa pag-ila. Napamatud-an usab ni Cagampang nga wala maunsa ang reseta ni Aguilar.
Natingala na lamang ang mga doktor nga lahe na usab ang isyu nga gihimo ni Aguilar nga maayo man ang pagtratar kaniya ug sa iyang asawang pasyente hangtod nga gi-discharge sila. Sa pagkatinuod gipabalik pa kini sa hospital alang sa follow-up checkup apan wala na kini mibalik.
Sa katapusan, subling gipahayag ni Dr. Cagampang nga bukas ang iyang opisina nga motubag sa bisan unsang reklamo labot sa serbisyo sa hospital.
Gipaabot pa karon unsang sunod nga himuong lakang sa ZDSMC ug ni Dr. Decastro-Quiroz mahitungod sa maong reklamo.
#VictoryZamboangaDelSur #TinuodNgaSerbisYu
