LAING ‘record high’ nga bag-ong kaso sa COVID-19 ang natala sa Zamboanga del Sur adlawng Mierkules sumala sa update nga gipagawas sa Integrated Provincial Health Office.
Subay sa talaan, nadugang ang 72 ka mga bag-ong kaso sa probinsya, ang pinakataas nga ‘single-day count’ sukad magsugod ang pandemya sa milabayng tuig.
Tungod niini, misaka na sa 551 ang kinatibuk-ang active cases sa Zamboanga del Sur diin nag-una pa gihapon ang siyudad sa Pagadian nga dunay 268.
Gisundan kini sa lungsod sa Aurora nga dunay 36, Labangan nga dunay 29 ug Tigbao nga dunay 24 ka aktibong kaso. Namatikdan usab ang pagtaas sa kaso sa mga lungsod sa Lakewood (17), Mahayag (16), San Miguel (16), Ramon Magsaysay (13) ug Molave (13). Sumala gihapon sa IPHO report, mokabat na sa 1,947 ang naulian sa COVID-19 samtang 61 ang namatay tungod sa maong virus.
Sa laing bahin, pipila ka mga LGU’s ang nalakip sa gitawag og risk classification sa pinakaulahing situational report sa DOH 9 kaniadtong Mayo 6, 2021. Apil sa high risk ang mga lungsod sa Bayog, Lakewood, Margosatubig, ug Ramon Magsaysay samtang moderate risk ang Pagadian City, Aurora, Dumalinao, Dumingag, Lapuyan, Mahayag, Molave, San Miguel, Tigbao, ug Tukuran.
Kalabot niini, subling nanawagan ang Provincial Task Force nga sundon ang gipatuman nga basic health protocols sama sa kanunay nga pagsuot sa mask ug face shield, kanunay nga paghugas sa kamot ug ang pag-obserbar sa social distancing sa mga pampublikong lugar. Likayan usab ang dili importanteng biyahe hilabi na sa mga lugar nga taas ang kaso sa Covid-19. Gihingusgan karon sa mga local health units ang contact tracing arun makontrolar ang posibleng pagpanakod pa sa nasangpit nga virus.
#VictoryZamboangaDelSur #TinuodNgaSerbisYu
