Nakumpiska sa gipahigayong search and seizure operation ang P544,000 nga kantidad sa iligal nga droga gikan sa usa ka inmate sulod mismo sa Zamboanga del Sur Provincial Jail, Brgy. San Jose, Pagadian City, Martes sa gabie, Mayo 25.
Nasayran nga sa wala pa gilusad ang operasyon, nakig-meeting una kang Governor Victor J. Yu ang mga operatiba sa Philippine Drug Enforcement Agency ug Zamboanga del Sur Police Provincial Office diin mihatag gilayon og ‘go signal’ ang gobernador sa raiding team bandang alas-9:30 sa gabie nga miresulta sa pagkasikop sa usa ka drug personality sulod sa bilangguan.
Si ZSPPO Director PCol Ruel Lami-ing nagkanayon nga motimbang sa 80 gramos sa gituhoang shabu ang nakuha gikan sa usa ka PDL nga nagngalang Danilo B. Martinito, 45 anyos, dunay kasong gun-running ug miembro sa nabaniog nga Alferez criminal gang sa Ozamiz City, Misamis Occidental.
Pagsaysay ni Lami-ing nga ang nahitabong surprise inspection sa provincial jail usa ka follow-up operation sa nahitabong pagkasakmit sa 39 gramos nga shabu sa usa ka drug personality sa Pagadian City adlawng Lunes. Nasayran sa imbestigasyon nga pareho og supplier sa droga ang mga nadakpan.
Pagpaambit ni Lami-ing nga mipasalig si Governor Yu nga dili konsentihon ang iligal nga aktibidad sa bilangguan og nga walay mahitabong ‘white wash’ sa pagahimuong imbestigasyon.
Gipadayag usab niya ang pagahimuong lakang sa kapulisan ilawom sa iyang pagdumala labot sa pagkakumpiska sa illegal drugs sulod mismo sa bilangguan.
“We need to double time our efforts, sa law enforcement natin together with the provincial jail and other jail facilities. We will coordinate with the jail wardens so that we can conduct Oplan Galugad on regular basis,” pahayag ni Lami-ing.
Gidugang usab sa provincial director nga maghimo sila og separate investigation aron masuta kung dunay kalambigitan ang mga jail personnel sa pagpasulod sa ginadiling droga sa provincial jail.
Sumala ni PDEA-ZDS Provincial Director Cesario Judilla, daling miangkon ang detainee nga si Martinito nga gilubong niya sa yuta ang drogang shabu. Mag-atubang siya sa kasong paglapas sa Section 5 sa Article 2 Republic Act 9165 kun Comprehensive Dangerous Drugs Act of 2002.
Samtang gikonsiderang ‘isolated case’ ni Jail Warden Joey Villanosa ang nadiskubreng shabu sa presohan nga gipaagi matud pa sa usa ka package delivery pasulod sa pasilidad. Maghimo usab sila og kaugalingong imbestigasyon labot sa nakalusot nga droga sa Zamboanga del Sur Provincial Jail. (ZDS/PPB)
#VictoryZamboangaDelSur #TinuodNgaSerbisYU
