MOKABAT sa 436 ka mga day care workers gikan sa duha ka distrito sa Zamboanga del Sur ang midawat og honorarium gikan sa kagamhanang probinsyal sa pagpanguna ni Gov. Victor Yu ug Deputy Speaker Cong. Divina Grace Yu adlawng Mierkules, Hunyo 16, 2021.
Giapod-apod ang maong ayudang pinansyal sa lima (5) ka managlahing venue sa Provincial Government Center sa Dao, Pagadian City isip pagsunod sa social distancing measures ug basic health protocol subay sa naglungtad nga COVID-19 guidelines.
Malipayong gidawat sa mga accredited day care workers ang P1,500 samtang P1,000 alang sa mga nag-expire na ang accredited registration. Ang pondo alang sa maong ayuda gikan sa 2020 budget sa probinsya.
Sa pamulong ni Gov. Yu, iyang gidayeg ug gipasalamatan ang dakong kontribusyon sa mga day care workers sa pag-ugmad sa mga kabataan sa barangay pinaagi sa ilang pagtudlo ug pagbansay sa mga gagmayng bata.
“Importante kaayo ang inyong papel sa pag-umol sa kinaiya ug kahibalo sa mga bata nga inyong giatiman sa day care centers,” sigon sa gobernador.
Mipasalig usab si Gov. Yu nga dugangan ang ilang nadawat nga honorarium sa sunod tuig isip pahalipay sa ilang kakugi sa ilang tahas sa barangay.
Samtang si Deputy Speaker Yu nagkanayon nga ang maong tabang pinansyal sa mga day care workers timaan sa pagtan-aw ug pag-atiman sa gobyerno sa mga yanong katawhan. Dugang pa niya nga unta mahimong inspirasyon sa mga benepisyaryo nga mas buhaton pa ang ilang trabaho ug magpadayon sa matinud-anong pagpangalagad.
Mao kini ang pinakaunang higayon nga gihatagan og honorarium ang mga day care workers sa lalawigan ug nahimo lamang kini panahon sa pagdumala ni Gov. Victor J. Yu.
Mao kini ang pinakaunang higayon nga gihatagan og honorarium ang mga day care workers sa lalawigan ug nahimo lamang kini panahon sa pagdumala ni Gov. Victor J. Yu.
#VictoryZamboangaDelSur #TinuodNgaSerbisYU
