Kaandam sa pagtabang. Kini ang gipakita nga kaabtik sa mga fire volunteers sa Zamboanga del Sur Provincial Disaster Risk Reduction Management Office human miulbo ang sunog sa Purok Sandayong, Brgy. Sto. Nino, Pagadian City adlawng Huwebes.
Nasayran nga pinakaunang miresponde ang PDRRMO Community Fire Auxiliary Group sa natigayong sunog dala ang ilang fire truck aron pagtabang sa pagpalong sa kalayo nga nagsugod sa may alas-10 kapin sa buntag.
Bisan sa kalisod sa dalan pasulod sa mga nasunugan, gihimo sa mga pito (7) ka fire volunteers ang ilang makaya aron moabag sa mga bombero sa siyudad.
Kahinumdoman nga mitabang usab sa pagresponde ang PDRRMO fire volunteers sa dihang nasunog ang Jabines Copy Center kaniadtong Marso 24 ning tuiga – ang unang higayon nga nakasinati sila og aktwal nga fire response human sa ilang upat (4) ka adlaw nga fire volunteers training course kaniadtong Marso 19.
Sumala sa impormasyon ni Brgy. Kapitan Eliezar Anuta, mokabat sa 16 ka panimalay ang naugdaw sa maong sunog. Kasamtangan kini silang gipasilong sa Day Care Center sa Purok Sandayong.
Nagsugod matud pa ang kalayo sa balay sa usa ka residente nga nagngalang “Analyn” ug daling mikatay sa mga silingang panimalay. Gibana-banang mokabat sa P150,000 ang damyos nga gibilin sa maong sunog.
SALUDO SA ATONG PDRRMO FIRE VOLUNTEERS!
#VictoryZamboangaDelSur #TinuodUgAktiboNgaSerbisYU
