Mokabat sa 525 ka benepisyaryo gikan sa siyudad sa Pagadian ang midawat og cash payout sa ikatulong batch sa programang Tulong Panghanapbuhay sa Ating Disadvantaged/Displaced Workers (TUPAD) sa Department of Labor and Employment, adlawng Mierkules, Hulyo 14.
Ang distribusyon sa ayudang pinansyal gipangunahan ni Gov. Victor J. Yu ug Deputy Speaker Cong. Divina Grace Yu kauban si Provincial Legal Officer Atty. Jackielyn Bana. Kini gipahigayon sa 3 ka managlahing venue sa Provincial Government Center, Dao Pagadian City isip pag-obserbar sa COVID protocols.
Matud ni Gov. Yu nga ang pondo nga gigamit alang sa TUPAD nagagikan sa national government uban sa pagkugi ni Deputy Speaker Yu nga gitagana alang sa mga trabahante sa probinsya nga naapektuhan sa pandemya.
Si Cong. Yu nagpasalamat kang Presidente Rodrigo Duterte tungod sa pondong P50 milyones nga gigahin sa gobyerno sa maong programa diin gibana-banang 10,500 kinatibuk-ang benepisyaryo ang modawat og tag-P4,740.
Malipayon nga miuli sa ilang panimalay ang mga residente nga nakadawat sa ayudang pinansyal gikan sa gobyerno nga makaabag sa ilang pang-adlaw adlaw nga galastoan.
Ang TUPAD usa ka safety net program sa DOLE nga naggahin og temporaryong wage employment ngadto sa mga trabahante sa informal sector.
#VictoryZamboangaDelSur #TinuodNgaSerbisYU
