GIKUMPIRMA ni Provincial Health Officer Dr. Anatalio Cagampang Jr. adlawng Mierkules nga wala pay na-detect nga delta variant sa novel coronavirus (COVID-19) sa Zamboanga del Sur.
Kini ang gipaklaro ni Dr. Cagampang atol sa programang “Kasayuran Express” human dunay migawas nga hungihong nga nakasulod na ang maong gikahadlokang variant sa probinsya.
Sumala ni Cagampang nga subay sa datos nga ilang nahipos, dunay natalang 29 ka kaso sa COVID variants sa lalawigan gikan Abril hangtod Hulyo ning tuiga apan kasagaran niini giila sa Philippine Genome Center nga Alpha (UK) ug Beta (South African) variants.
Sa pinakaulahing resulta nga nadawat sa Integrated Provincial Health Office gikan sa PGC karong semanaha, 19 ka kaso ang namatikdan dinhi sa probinsya nga nahisakop sa mga bag-ong variant. Ang Pagadian City mitala og usa ka Alpha variant ug 4 ka Beta variants. Ang mga lungsod sa Bayog, Dimataling, Dumalinao, Margosatubig, ug Molave mitala usab og tagsa ka Beta variants. Ang Aurora mirekord og tagsa ka Alpha ug Beta variants samtang ang Tambulig mitala og usa ka Alpha ug 3 ka Beta variants. Samtang ang Midsalip, Vincenzo Sagun ug Lakewood parehong nakaangkon og tagsa ka Beta variants.
Pagpasabot ni Cagampang nga kumpara sa ubang variants, ang delta variant usa ka ‘superspreader’ nga klase sa virus diin kaya niining makatakod sulod lamang sa 1-5 ka minuto sa panagtapok. Kaya niining himoong “severe” ang sintomas sa nataptan sulod lamang sa pipila ka oras. Dugang pa niya nga bisan fully vaccinated ang usa ka tawo, naa gihapo’y tsansa nga matakdan apan mas grabe ang mamahimong epekto niini ngadto sa mga wala pa mabakunahan ug ilabina sa mga dunay comorbidities nga “unvaccinated.”
Pahimangno ni Cagampang nga dili magkompyansa ang matag-usa ug padayon nga mosanong sa naandang minimum health standards ug labaw sa tanan ang pagpabakuna. Segun sa ZDSMC chief nga ang bakuna mao ang nakitang pinakamaayong solusyon aron mapanalipdan ug maproteksyonan ang katawhan batok sa peligrosong variant tungod kay bisan pa man nga dunay tsansa nga mataptan, kutob lamang sa mild symptoms ang motumaw sa pasyente ug dili na mograbe pa.
Gipadayag usab sa doktor nga kinahanglan hugtan ang borders sa lalawigan aron masiguro nga mosunod sa travel protocols ang mga biyahero ilabina kadtong gikan sa mga lugar nga duna nay presensya sa delta variant.
Sa katapusan, gidasig ni Cagampang ang mga Zambosurian nga dili mahadlok magpabakuna aron makab-ot na lalawigan sa dili madugay ang ‘herd immunity’ ug makabalik na og hinay-hinay ang tanan sa normal nga kalihukan. // (ZDS-PPB)
#VictoryZamboangaDelSur #WeHealAsOne
