MOKABAT sa 29 ka pamilya nga nabiktima sa sunog sa Brgy. Sto. Nino, Pagadian City ang nidawat og ayuda gikan sa Zamboanga del Sur Provincial Government pinaagi sa PSWDO adlawng Martes, Agosto 3.
Gipangunahan ni Gov. Victor Yu, Deputy Speaker Divina Grace Yu ug Provincial Legal Officer Atty. Jackie Bana ang pag-apod apod sa financial assistance lakip ang tagsa ka sakong bugas ngadto sa mga benepisyaryo.
Ang mga homeowners midawat og tag-P10k samtang ang mga sharer o nag-abang og balay midawat og tag-P5k.
Mapasalamaton kayo ang mga nasunugan sa ilang nadawat nga hinabang nga giisip nilang dakong tabang aron sila makabarog pagbalik gikan sa giagian nilang krisis. Misamot pa gyud ang ilang kalipay sa dihang misaad si Gov. Yu ug Cong. Yu nga dugangan ang ilang nadawat nga ayuda pinaagi sa Regional Office sa Department of Social Welfare and Development (DSWD).
Ang residente nga si Giovanni Locaban mipadayag sa ilang pagpasalamat tungod sa pagtagad nga gihatag sa pangagamhanang probinsyal kanila nga mga biktima sa sunog. Samtang si Ruth Grace Alicante nagkanayon nga bisan pa man sa gamayng kantidad, gikalipay niya ang nadawat nga ayuda aron makatabang sa ilang mga panginahanglanon.
Kahinumduman nga natigayon ang usa ka sunog sa Purok Sandayong kaniadtong Hunyo 17 ning tuiga nga miugdaw sa 17 ka panimalay.
#VictoryZamboangaDelSur #TinuodNgaSerbisYU
