Pagadian City – GIKUMPIRMA sa Zamboanga del Sur Integrated Provincial Health Office adlawng Dominggo nga mitala na og unang kaso sa COVID-19 delta variant ang probinsya.
Sumala ni Provincial Health Officer Dr. Anatalio Cagampang Jr. ang unang delta case usa ka 22 anyos nga lalaki, returning OFW gikan sa Malaysia ug residente sa Pagadian City apan “recovered” na ang status niini base sa biosurveillance report nga gipagawas sa Department of Health.
Nasayran nga gi-swab daan sa Malaysia ang maong lalaki og migawas nga negatibo ang RT-PCR result niini apan pag-abot sa Manila mitumaw nga positive kini sa COVID-19 human gi-swab og balik. Nakumpleto niini ang 14-days quarantine ug gideklarang “cleared” para mobiyahe pauli.
Gipadala ang specimen sample sa maong pasyente alang sa genome sequencing sa Philippine Genome Center ug adlawng Dominggo nigawas ang resulta nga kumpirmado kining delta variant.
Nakauli ang maong returning OFW sa Pagadian City kaniadtong Agosto 6. Gi-home quarantine kini pag-abot apan sa pagkahibalo sa City EOC nga delta variant kini, gikuha ang pasyente pagbalik ug gibutang sa quarantine facility alang sa pag-obserbar sa kondisyon niini. Ipa-swab usab ang pasyente lakip ang iyang mga direct ug close contacts.
Sa tibuok Zamboanga Peninsula, tulo na ka mga probinsya ang dunay natalang kaso sa delta variant lakip ang Zamboanga City, Zamboanga Sibugay ug Zamboanga del Sur.
#VictoryZamboangaDelSur #ZamboangaDelSur
