Pagadian City – GIDUSO atol sa Provincial Inter-Agency Task Force Meeting adlawng Dominggo nga irekomenda sa National Task Force nga ipailawom pagbalik ang lalawigan sa Zamboanga del Sur sa Modified Enhanced Community Quarantine.
Sumala ni Board Member Atty. Dang Mariano, ang maong mosyon giendosar ni Molave Mayor Cyril Glepa ingon nga sulbad sa padayong pagsaka sa COVID-19 cases sa probinsya.
Gidason ni Mariano nga nahimong epektibo ang MECQ sa pagpakunhod sa COVID cases sa pag-implementar niini kaniadtong bulan sa Hunyo. Kahinumduman nga miubos ngadto sa 200 ang ihap sa active COVID cases gikan sa 900 apan mibalik pagsaka sa dihang miluag ngadto sa GCQ pag-abot sa bulan sa Agosto.
Sa pinkaulahing datos sa IPHO, misaka ngadto sa 1,046 ang kinatibuk-ang aktibong kaso sa COVID-19 sa probinsya human madugang ang 93 adlawng Dominggo.
Pagpasabot usab ni Atty. Mariano nga kinahanglan isalbar ang kahimtang sa mga healthcare workers tungod kay sila ang “last line of defense” batok sa virus. Nasayran sa pinakaulahing datos sa Zamboanga del Sur Medical Center, mokabat sa 23 ka mga medical workers ang nagpositibo sa COVID-19.
Si Provincial Health Officer ug IPHO Head Dr. Anatalio Cagampang Jr. nagkanayon nga 272 lamang ang bed capacity sa government ug private hospital sa tibuok lalawigan apan mikabat na og sobra 300 ka COVID patients ang giakomodar sa mga balay-tambalanan.
Gipadayag ni Governor Victor J. Yu nga mintras wala pa ang approval sa IATF labot sa girekomendar nga MECQ, kinahanglan nga hugtanong ipatuman ang preventive measures pinaagi sa pagsanong sa minimum health protocols ug ang vaccination ug dili lamang magsalig sa hospital tungod kay sa kasamtangan puno na kini ug daghang pang mga pasyente ang nadugang bisan pa man nagdugang na og tents alang sa mga pasyente.
Subay sa report sa Department of Health, nalakip ang Zamboanga del Sur sa mga lugar sa Pilipinas nga ilawom sa Alert Lvel 4. Sa maong klasipikasyon, giabiso sa DOH ang dinaliang pagpausbaw sa hospital beds ilabina ang ICU beds, ang pagsiguro sa igong oxygen supply ug ang pag-imposar sa granular lockdowns.
#VictoryZamboangaDelSur #ZamboangaDelSur #TinuodNgaSerbisYU
