Nadungagan og laing kaso sa COVID-19 delta variant ang Zamboanga del Sur sumala sa report sa Provincial Integrated Provincial Health Office adlawng Martes, Agosto 24.
Ang ikaduhang kaso sa maong variant usa ka 23 anyos nga lalaki, seafarer ug residente sa Brgy. Dumagoc, Pagadian City. Segun ni Dr. Anatalio Cagampang Jr., miuli ang maong lalaki kaniadtong Agosto 16 gikan sa Navotas, Metro Manila.
Niagi kini og RT-PCR test sa Red Cross sa wala pa mobiyahe paingon sa Pagadian apan wala masayri kon nagpositibo ba kini o wala. Hinuon, pag-abot niya dinhi sa siyudad, gi-usab kini og RT-PCR test ug mitumaw sa resulta nga positibo kini sa COVID-19 pagka-Agosto 18.
Apan sumala sa impormasyon nga gipailawom lamang kini sa home quarantine hangtod nga miabot ang genome sequencing result gikan sa Philippine Genome Center Agosto 23 ug nasayran nga kumpirmado kining delta variant.
Gihulbot gikan sa ilang balay ang pasyente sa samang adlaw ug gidala sa temporary treatment monitoring facility ning siyudad.
Gilaumang usban og swab ang pasyente karong Agosto 30 sumala sa taho sa Regional Epidemiology and Surveillance Unit.
Gibutyag ni Dr. Cagampang nga limitado lamang ang nakuhang impormasyon sa gihimong pakigkutay ngadto sa pasyente tungod kay wala na niini gitubag ang tawag sa IPHO. Padayon pa usab nga gisusi sa pagkakaron kung unsay kondisyon sa maong confirmed delta case.
#VictoryZamboangaDelSur #WeHealAsOne
