Liboan ka mga fruit seedlings ug uban pang igtatanom ang giapod-apod ngadto sa mga mag-uuma sa Zamboanga del Sur ilawom sa Pananom Program ni Governor Victor Yu ug sa Provincial Agriculture ning adlawng Huwebes, Hunyo 2 sa Maguindanao Hall, Provincial Government Center, Dao, Pagadian City.
Hisayran nga mokabat sa 2,000 ka mga grafted seedlings sa Nangka, 1,000 ka seedlings sa Giant Bamboo og 10,000 ka marcotted seedlings sa kalamansi ang giapod-apod ngadto sa 300 kapin kun kulang nga mag-uuma gikan sa nagkadaiyang lungsod.
Sa maong panagtigom gitudluoan ang mga mag-uuma kung unsaon ang hustong pagtanom ug pag-atiman sa mga seedlings, lakip na ang hustong pamaagi sa marcotting.
Gibutyag ni Governor Victor Yu nga sila pa ang unang batch sa beneficiaries nga nakadawat sa maong mga seedlings ug nihangyo siya nga atimanon og maayo ang ilang mga nadawat nga similya aron moani sila og dako sa umaabot nga panahon.
Gipasabot usab sa gobernador ngadto sa mga mag-uuma nga bisan og gamay lang kung kwentahon ang halin sa ilang mga abot, kung mo-increase ang kita sa mga farmers matag adlaw, dako kini og epekto sa dagan sa ekonomiya sa probinsya.
