APRUBADO na sa Zamboanga Peninsula Regional Development Council sa pagpanguna ni Regional Chairperson Gov. Victor Yu ang napulo (10) ka mga dagkong proyekto para sa Rehiyon 9 atol sa katapusang regular meeting sa council ning adlawng Mierkules.
Ang nasangpit nga mga proyekto gipondohan sa national government pinaagi sa paghilakip niini sa 2023 General Appropriations Act.
Lakip sa mga top projects nga giaprubahan sa council mao ang: Zamboanga City International Airport ₱5B; San Ramon New Port ₱2.2B; BFAR Aquaculture Production Facilities ₱237M; pagdevelop sa Domestic Airports (Pagadian, Ipil, Dipolog, Liloy, Siocon) ₱484M; PRO9 Centralized Network ₱726M; Drug Treatment and Rehab Center (ZDN/ZSibugay) ₱170M; BFAR Capture Fisheries Productivity Enhancement Project ₱998M; Zamboanga Peninsula Broadband Network ₱727M; Development of Regional Center, Pagadian City ₱2.746B; ug ang Integrated Watershed Management Plan sa Sindangan River Basin ₱1B.
Gilauman nga pinaagi sa maong mga dagkong proyekto sa imprastraktura, agrikultura, ug teknolohiya, mas matagamtaman sa tibuok Zamboanga Peninsula ang gitinguhang kalambuan sa musunod nga katuigan.
Gikalipay usab ni Governor Yu ang naaprubahang mga budget alang sa padayon nga pagbalhin ug pagpalambo sa Regional Development Center site dinhi sa Pagadian lakip na ang pagpanindot sa Pagadian City Domestic Airport.
