PORMAL ng nadawat sa usa ka estudyanteng Pagadianon ang iyang medical scholarship grant gikan sa Provincial Government sa mismong buhatan ni Governor Victor J. Yu ning adlawng Huwebes, Hunyo 2.
Si Shalymar Singh, 25 anyos, residente sa Brgy. San Jose, Pagadian City mao ang pinakaunang beneficiary sa maong programa nga gitagana alang sa mga aspiring doctors sa probinsya nga mismong inisyatiba ni Gov. Yu. Nagtungha siya karon sa Brokenshire College sa Davao City.
Matud niya nga mapasalamaton kaayo siya sa maong scholarship tungod kay dili sayon ang mga bayrunon sa kursong medisina. Pagsaysay ni Singh nga una siyang nagpasalamat sa pag-accommodate ni Cong. Victoria Yu sa iyang pangutana labot sa maong scholarship ug tuod human ma-comply ang mga requirements, na-avail gayud niya ang maong academic scholarship aron matuman ang iyang pangandoy nga mahimong doktor.
Kahinumduman nga kaniadtong Abril 22, 2021 giaprubahan sa Sangguniang Panlalawigan ang Ordinance No. 055 nga nagtagana og medical scholarship sa mga kwalipikadong aplikante nga gustong mahimong doktor. Nakalatid sa maong ordinansa nga mogahin og 5 ka slots sa academic scholarship ang provincial government matag tuig diin mapahimuslan ang libreng tuition fee, transportasyon, uniform ug libro, lodging allowance ug uban pang mga panginahanglanon sa student beneficiary.
Ang nasangpit nga scholarship mamahimong ma-avail sa bisan asa nga tulonghaan nga accredited medical school.
Gipahayag ni Gov. Yu nga pinaagi niining maong ordinansa, mahatagan og kahigayunan nga molampos ang mga aspiring doctors sa lalawigan ug makatabang sa pagserbisyo sa atong Zamboanga del Sur Medical Center.
